Archive: Winchester, Old Minster

[A.D. 854.] Æthelwulf, king, to (Winchester Cathedral); confirmation of the beneficial hidation of Chilcomb, Hants. English.

 

[O]n þæs naman þe on eces lifes bec on heofonan þa awrit þe her on life wel ge cwemaþ ; [I]c Aðvlf kyningc on ðysum ge write ge swutelie be Ciltacumbes fr[e]ulse ðone þe Kynegyls kyningc þe ærest kyninga cristen gewearþ on west Sexan his fulluht fæder Sancte Bir[in]e biscope ge uþe 7 siþþan ælc þæra kyninga þe æfter oðran on west Sexan wæron gefriðodon 7 gefyrðredon þeah þe he ær on gewrite ne stode oð hit to me com þe nu se nygoþa kyningc eom . Eac ic her ge swutelie þæt ic þisne freols æt foran sancte Petre on Rome 7 þam halgan papan Leone swa ge fæstnode swa swa me 7 eallan ðeod scype ge wearþ on Englalande ær ic to Rome fore . þæt wæs þæt mon ælles ðises freolses are æfre for ane hide werian scolde . for þam þe Godes ar æfre freogre beon sceal þonne ænig woruld ar . 7 min sune eac Ælfred þe mid me for 7 þær to kyninge gehalgod wæs þan papan on hand ge sealde þæt he ðisne freols æfre ge fyrþrian wolde . 7 his bearn gif him God ænigra ge uþe to þam ylcan sprittan wolde .

Ic eac beforan þam ylcan papan ealle þa land are þe ic on Angla þeode heafde Gode into halgan stowon for me 7 for ealle þeode geteoðode . 7 on Rome be þes papan fyrþrunge 7 leaue mynster ge worhte . Gode to loue 7 sancta Marian his halgan meder to wyrþmynte . 7 þær Englisce scole ge sette þe æfre nihtes 7 dæges for ure þeode Gode þywian scolde . 7 þa þa ic on eard com . ic on cyððe ealle folce hwæt ic on Rome ge don hæfde . þa þancodon hy þyses Gode 7 me swyþe georne 7 heom eall þis swyþe wel licode . 7 cwædon þat heora þances þis on ecnesse stande .

Nu halsie ic þurh þa halgan þrimnisse 7 sanctus Petrus 7 ealne þane haligdom þe ic on Rome for me 7 for ealne þeodscype ge sohte . þet næfre ne kyningc . ne æþelingc . ne biscop ne ealdorman . ne þegen . ne gerefa hine si'l'fne swa earme for wyrce þæt he þisne freols ge lyttlie þe he swylcre ge wittnesse ge festnod is . buton tweonan se þe hit deð . he abilhd Gode 7 sancte Petre 7 eallæn þam halgan þe on Romes cyrcean restaþ . 7 him seluan ece helle wite unge sæliglice getilaþ . Eac se halga forsædæ papa Leo Godes curs 7 sancte Petres 7 ealra halgena 7 his on þæne ge sette þe þis æfre undo . 7 eac eall þes þeodscype ge on ge hadodan ge on læwedan þæt ylce dyde . þa ic on gean com 7 him þis cyþde .